（第一場）肥仔糖退出，一路奇兵一枝獨秀，韋達於轉直路前仍是留在七駒之後，迄電算機前方始發力，甜蜜至上如非勞愛德策騎，大熱門殆矣！勁多勝似屬普渡馗替身，柏寶匹次熱門竟無一段交待，而競賽小組居然無一語提及，應有過分縱容之嫌。贏馬組合為自己友，連四連環亦不會放過，韋家軍旗開得勝！
（第二場）柏寶捨光芒四射、錢照贏不策，卻取去鄭雨滇坐騎綠茵勁贏，此馬捧成次熱，因心律不正全程墮後，反而棄騎錢照贏則一騎絕塵，贏到無馬可追，另一匹棄騎光芒四射後上入腳，為澳系錦上添花。大熱門勁高手力保連贏，蔡神仙面子較徐雨石體面得多！小蜜蜂出閘失機，中段耗力，但下季初即可出頭！
（第三場）精英財星由梁定華轉入苗禮德手上，第四戰終於取得首度頭馬，馬偉昌留頭鬥後贏得從容，下季回升三班仍有再捷機會。旅遊大亨全程第二，蔡明紹最近尚替前駒執韁，可能賣個順水人情。勵盈份屬圍內，上浦駿將人棄我取，皆非鬥出嚟之成績。大熱門清風駒以招積仔為替身，但為德不卒，奈何！
（第四場）騰雲駕霧以主帥白德民押陣，與廐侶卓爾非凡展開雙出擊戰略，騰雲駕霧全程主動，可惜最後一百幾十米不能埋尾，而副車卓爾非凡又後上不及，敗於戶外名駒蹄下，早知如此以卓爾非凡行先，摩廐不致全軍盡墨。從胡森轉入姚廐之戶外名駒，有說是安鞍之影子馬，否則有何人夠膽攪渦大摩檔攤！
（第五場）極速寶寶雖然以一頸之微贏不出今季五班最末一仗，總算大步跨過！辣得喜愈贏愈冷，信心不大，升上一級，熱捧不宜。盈福、喜鵲分列三、四，一放一追，位置對象，打真軍應非颯若風、驕陽飛駒對手，講分頭亦遜於自動加速及華忠寶。創先機、奪寶群英走勢含蓄，若主力出擊，三甲甚穩。
（第六場）柏寶在靚好聲、歡樂寶寶及漸信良駒三駒揀中靚好聲，此馬今季三度熱垮均由韋達、柏寶執韁，今次仍由柏寶坐鎮已嚇窒班跟風客，隔夜賠率已超越十倍以外，雖然出閘包尾，但末段後勁凌厲大勝三乘，以前幾次之敗係跑乜嘢馬？不難想像。善風以半力奪Ｑ，漸信良駒、按得醒甚至吉利多都係戥人高興一族。
（第七場）今場展開五駒衝線鏡頭，前四名以短馬頭而分先後，就算第五六名之傳奇快車與寶貝王子亦僅以一頸之差而已，人人興旺初出跟入第四，今次落注搏殺，憑鄭雨滇之手風與信心，映相得勝。近卅倍之八逢九紫以一鼻之差而敗，輸在運氣與實力無關，第三四之福將臨門、雄心馬主亦可作如是觀。
（第八場）十匹馬爭沙田一哩錦標，打硬仗僅得一匹競駿精英，卻因鼻血影響僅保連贏，若柏寶推少兩吓難免撻Ｑ之譏。金獅威將除初出爆半冷外，九度上陣僅獲四次位置，迄季末方取得第二場頭馬，如非強敵身體有毛病，不易輪到。安御大熱垮台，對金獅威將之好賠率不無影響，摩、方兩廐亦有搖旗吶喊之功勞。
（第九場）大摩之半冷馬活力至寶繼第四場卓爾非凡後又一次為牌仔攪渦檔攤，去到二百米段柱時已勝券在握，最後一步先後為金堡龍華、中國心越過，論時速普通過普通，大概馬房中人亦要檢討一下矣！川河勁駒出錢出力，得益者為摩、方兩廐，至於是否冷頭熱腳，倒亂乾坤？局外人難明究竟。
（第十場）黎海榮繼戶外名駒後，千江映月為姚廐完成三捷之願，對手又係方廐之大熱門，一言為定跑千六米並非強項，上次柏寶熱垮之教訓猶新，擺個十磅仔上去即贏，置大師傅於何地？寶利多仍有餘力，揀得正未展所長，下季應向中長途發展。共同努力、闊袍大袖均不會同方廐為難，留在三班，亦難輕侮。
（第十一場）今季煞科戲由摩廐共創未來擔大旗，白德民留頭鬥後，大熱開齋，升上頂班其未來有若何進度，不宜過早定評！貝利高一早守住食糊位，成隻指定冷腳，愛跑得、蓬萊仙子兩隻同綫馬亦有同感。虎虎生輝居然招來三百多萬獨贏，大摩分多幾毫子實拜此駒之賜。戰河全程跟跑，呢匹蔡廐搵食馬下季初即可一戰。
文章
沒有留言:
發佈留言