一得之見
（第一場） 「福譽」上仗助於形勢，有惡馬照住，若今次少過五倍，能交回一席位已是上上大吉，「天寶之威」做完媒人婆，發威此其時矣！對手為兩個澳洲佬，「天下寶」較勁，「香港發」次之，臨場仍是銀紙掛帥，兩隻都熱極不發，「彩虹幻影」入圍不用疑真疑幻！大冷腳「有盈有利」。
（第二場） 柏寶上仗騎「滿貫之寶」臨尾食唔出雙辣，數番幾十糊尾了事，今捨此駒而取「鑽飾天使」，難道呢匹愛爾蘭高價馬有料到？若有七八倍左右，不妨捧場，熱得過份未必係「齊勝」對手，韋達無寶不立，賠率合理勝完可以再勝。配腳「快達小子」、「英雄得勝」都靚，過份冷落，贏亦不奇！
（第三場） 「足智多謀」爆冷開齋之役是「印度光輝」大熱垮台，星哥一怒而轉飯鑊，第二仗即用柏寶執韁，睇蘇保羅是否替馬主拚盡，抑或俾番幾分薄面矣！「靚好聲」有十倍左右一定掌聲四起，賠率過奀，媽媽有聲！免傷和氣是走隻「豹顯神駒」出嚟，冷腳可串「常盈多」！
（第四場） 「皇仁勁駒」上季十四戰僅獲三位，今季易廐後加緊操練，新廐新人，希望一新馬迷耳目，對手為南非雙傑，「多豐裕」居首，其次為「深智能業」，揀隻合價錢者不中不遠，兩隻都不對胃口，「駿盈」應該贏得好好睇睇。「勝利旋鋒」上賽走勢不俗，但易配而無分頭，主力係郭立基嘅「我的」。
（第五場） 「驚雷」贏馬換人旨在求冷，若少過四倍，宜兼位置，掩護「翡翠明星」似乎過份直接，彈去「叻叻仔」，容易交待。第三勢力「你好我好」，最近兩仗愈來愈近，有十倍左右，大家都好！澳系兩駒要贏前述數騎，一定要加不少人事，「銀飛龍」已見七七八八，仍有進步者為「鄉村活力」！
（第六場） 「威老虎」馬如其名，賀賢呢匹私家馬的確威過老虎，得降班之利如虎添翼！對手亦係降班馬「紀利威威」，打硬仗首駒睇高半籌。兩駒都熱，抬起半座電算機之時，最妙是走咗潘頓之「勁加勁」上嚟，一定過百！冷腳最惡「神奇飛龍」，其次「太陽雄心」。
（第七場） 「風雲」在馬偉昌胯下，上仗以叱咤則風雲變色姿態輕勝一場，如要添食在騎者一念之間而已！對手先數「飛翔星」，其次「悅璐孖寶」，一熱一冷悉隨君便。「威猛」在韋達手上操到如火如荼，韋達加胡森值幾多至買得過，屬觀點與角度問題。冷配勿忘「好好機會」。
（第八場） 「超新鮮」上季在高廐連跟三場，毫無好感，今季一轉姚本輝旗下，即由頭帶返，爆冷開齋，賽後古仔多多，睇今場表現可知端倪，對手「名馬」兩拚熱垮，如有馬孭飛，睇佢又攪邊科？半冷提供「喜蓮芳芬」，仍是淡而無味，「幸運紀錄」即可出頭。「勁賽王」退熱亦可考慮。
（第九場） 「名舵主」上賽贏得微妙，捧盃者未必輪到，熱捧不宜，「好好計」上次替人夾計，今次自己搵食，夠殺有餘，爭勝人馬為「金鎸龍華」，不打硬仗何必換潘頓押陣？其次數到「恩格斯」，試閘出色，最合半冷。「善寶」由韋達試準，「貝利高」一味靠放，均可令熱門馬顧此失彼。
（第十場） 「喜惑」寓操於賽，蔡神仙用到呢招，罕曾見也！博你唔信，有錢分不妨少敲。正路馬是「卡加大師」鬥「綠色威」，較好分者先行，尾場亦不常見，重心難覓唯有博冷。「超光越影」有十倍左右，優先考慮。大冷腳「競技英雄」不可走寶。
文章
沒有留言:
發佈留言