一得之見
（第一場） 今晚頭場仍是以五班馬打頭陣，照近態選材，是「飛天龍駒」鬥蘇偉賢廐兩駒之局，「辣得喜」熱而「雄姿儷影」冷，何去何從，悉隨尊便。半冷睇好「明威」，郭能鬥志單純，不會底出。冷腳落於胡廐「高山威龍」，太熱自然是「中國好」！
（第二場） 「青春得意」由虫變龍，爆出巨型冷門，胡森賽後研詢，總算俾佢吟甩，今次改用炙手可熱之潘頓，睇佢又使出何種手法，令此馬不入三甲，拭目以待可也！對手最堅「領航精神」，其次「快樂時光」。配腳有二，「辣手先鋒」只算半辣，「高明威威」正宗雙辣！
（第三場） 「跑贏大市」今季出賽八場，有幾場似有去馬跡象，而總欠臨門一腳，今次柏寶停賽改聘巫大帥，派彩合算出頭有望。對手首推「蓋世子牙」，老而未頹，配韋達多添幾分牙力，穩位望贏。第三勢力為「大把世界」，配莫雷拉唔會太好世界，十倍左右已值得還神！冷配「中環英雄」、「龍華太旨」不相伯仲。
（第四場） 今場關係數大彩池，值得加意推敲，睇牌面是兩個法國佬打骰，「乖乖寶貝」此程一贏三位，實力三班夠贏，「一觸即發」三戰跟入兩位，仍未觸動過發熱點，局外人都係靠估，反而苖廐之「珍珠有利」轉交莫雷拉可能有出人意表演出，半冷可敲。冷配「共創良機」、「伽楠」皆可一敲。
（第五場） 「足智多謀」上次單騎放出，到底係馬房有計，一人獨食，抑或隻畜生勇到拉唔住，只有少撮人得益，天曉得！但今次一定要交待清楚，以表清白。「公証揚聖」亦係前次爆得唔清唔楚，改配好手以證公道。半冷「神奇飛龍」，配腳最靚「生豪」，其次「豹顯神駒」。
（第六場） 今場「環保戰士」、「寶貝王」及「坪踪捷影」三駒鼎足而立，但息息相通，稍有疏虞，即有剝錯牙之痛，非睇清睇楚莫作運財之童。如一定買多少玩吓，「萬事盛」贏位兼投，或有意外收獲。大冷腳小敲「確威龍」如何？
（第七場） 三寶次關由韋達兩騎把持大局，是「經濟達人」還是「金獅快將」，局外人難覓究竟，總而言之，一定有一班人唔好彩！第三勢力為「旅遊名牌」，安國倫鬥志鮮明，有十倍左右差唔多矣！配腳「首飾孖寶」行頭，「牛精仔」跟住到。
（第八場） 煞科戲盡在「水禾田」一族，「迎風飄揚」、「皇者拍檔」及「興趣」三匹實力馬均同一鼻孔出氣，稍一不慎即有剝錯牙之虞，將三隻炒埋一碟又妨浪費火葯，或贏位兼投擺落去隻前主席馬身上，十倍左右或會引起投注者「興趣」！冷配「多旺財」、「盈威勇士」難分軒輊。
文章
沒有留言:
發佈留言