（第一場）五班馬又爆一場，沙田寶在伍碧權馬房十一仗不入圍，上賽易苗廐由小強押陣放到電算機前已足千六米，今次改配楊明綸亦一放到底，伍廐亦應從新自我檢討，否則旗下馬匹廿零隻好易走清也！愛拼者贏、風馳電掣輸得有理，誠信心人棄我取。活力威、安競下次應該輪到！
（第二場）錢照贏上仗初出即捧成大熱，今次由柏寶轉交勞愛德亦交足功課，跑完八百米位置不變，此時緊貼前駒之精靈勇駿即接力而前，輕爆半冷，此質新馬上賽亦係老勞為佢執鞭跟入冷位，話佢底出誰曰不宜？賴維銘乃吳廐主力，高飛飛隸屬南非苗，連好笑容、好快活打起算盤均關係密切，何其巧也！
（第三場）經過兩場賽事之後，直接間接皆與南非幫都有關係，今場大勢仍由南非三傑把握，主角自然屬馬皇帝，由勞愛德、普萊西分別騎上萬人迷與連利威勁，但何以又為鄭雨滇之宇宙良駒放垮大局？聽場邊人語︰此馬來港首仗係韋達執韁，由小告轉徐廐亦由某人擺佈，今次放佢一馬好出奇咩？思之不無道理！
（第四場）極速寶寶點成首熱，濰坊因何澤堯而成次熱，南非勞之封面三熱，結果走出大冷馬足球大師、盈嘉飛駒，前者意料中事，後駒九戰遠離水準，全港大小傳媒亦無一人提及，此馬由隔夜賠率三十二倍跌至廿個開，有小撮人發到唔清唔楚矣！足球大師為極速寶寶替身，盈嘉飛駒由何人照住？心照不宣！
（第五場）電算機上呈現出不尋常現象，實力馬確叻星、九龍寶自始至終徘徊於十倍之間，反而處女馬精英財星一枝獨秀，同時質新馬按得醒憑一次試閘出色而成次熱，可能對上兩場勝出影響，小鄭雖然出閘脫腳，但信心十足，一條直路逢馬過頭，未達終點已舉手作勝利姿勢矣！呂廐又多一條夾萬鎖匙！
（第六場）方、胡兩廐已把握大局，旺國手聘用柏寶押陣，廣友名駒近勝長途兩次，怒火優勢磅輕態穩，唯一未露殺機者是鎖定目標，接戰之下竟然全非金獅猛將之敵，韋達今場前追怒火優勢，後拒旺國手，後駒除了得一個熱字之外，毫無是處，所謂有智慧不如形勢，到今日為止，仍是韋家天下！
（第七場）從尚駿心、延續美麗兩駒之一冷一熱，一去一留，人工賠率發揮得淋漓盡緻，兩駒都係韋達坐騎，賣剩蔗尚貴重過揀手貨不合情理，係人都知！小橋流水有人順水推舟，大放交情，單Ｑ勝過獨贏接近十倍，邊條籌長？何況其他彩池尚未計算在內也！皇仁神駒、超力駒仍可再快，初出之電訊超星更宜重視。
（第八場）質新態勇之天久贏馬換人，已犯馬場大忌，其次此馬陣上兩度馬鞍滑移，已佈下輸馬伏線，今仗雖然出閘失機，而轉入直路已超越放頭馬酒勝、奇異福星，結果敗於眾矢之的盈彩繽紛，韋達未下一鞭即輕易完成六捷，若今場天久有正常待遇，大師傅去馬一定要多費功夫！奇異福星不妨追多一次！
文章
沒有留言:
發佈留言