（第一場）新馬場合仍是韋達打骰，電算機上則由軒轅勇將及福建王者也文也武，而有過表現之幸運多多及美妙時機卻少人注意，兩匹孭飛馬放得似模似樣，超晒班去到電算機前亦同時轉慢波，最後二百米陽明飛飛、如願以償竟成單對單之局，杜利萊較冷自然如願以償，幸運多多憑馬偉昌推多兩吓，南非系連汁都撈埋！
（第二場）杜利萊上場替蔡廐贏出新馬如願以償，今賽連上陣逾一百次之老馬神殿亦照單全收，此人包辦第一口孖寶唔見咗近二十巴仙，法、非兩幫皆大歡喜。勇蹄飛在梁明偉胯下都有不俗表現，實業輝煌亦係一分零九秒以內之超級馬，加埋隻馬皇帝均屬首駒之茄厘啡，至於大熱門常山鳳寶，還是不評也罷！
（第三場）何澤堯終於爆冷開齋，年年如意轉直路後仍受八九匹馬包圍，小何左穿右插終底於成，估計短期內與另一位十磅仔梁家偉都成為搶手貨矣！今場最熱一匹濰坊都接近六個開，應是群雄無首之局，暖在心頭似屬南非系主力，智勇非凡映相得第三，柏寶走入四連環仍有兩萬元派彩，今場算係乜嘢格？五班馬真難估！
（第四場）繼杜利萊起孖後，何澤堯騎上後備補上之天久再下一城，包辦第三口孖寶，今賽前追霹靂槍，後拒共創未來，具見功力。戰河初出居然捧成大熱，對小何之見面禮唔細也！共創未來與霹靂槍均屬戰河之戰友，軍刀身份等同濶袍大袖之替身，客串一席四連環已算交待清楚，好過戰河之擁躉跌咗落水！
（第五場）廣友名駒今季十二次上陣僅拚得四席位置，終由杜利萊打開勝利之門，半條直路居然無馬可跟，亦交出此馬全盛期之九成水準，連主席馬好運得福亦退避三舍，後駒上賽一條直路連過十餘駒之衝勁蕩然無存，呢班江湖客都算沙膽！越跑越有名不符實，好旺財旺咗隔鄰，與好運得福都係五十步笑百步！
（第六場）睇見杜利萊勝出第三場頭馬，何澤堯話你唔聽佢又來，松風較上場天久難度更高，前追幸運相架、雄心馬主，後拒升班負輕磅之高歡，值得一讚！高歡上賽贏千六米，末段輕締廿三秒五，今仗廿四秒二輸馬，小賴過度自信矣！信賴途中受阻，幸運相架映相後四連環不入，有相架而欠相片，得物無所用！
（第七場）標青上仗由兩個南非客玩足全場，今賽贏馬換人得個「跟」字，事實胡森起孖，杜利萊過三關已食飽，形勢上今場屬南非系揸拂，中環英雄上仗應勝未勝，雄心威龍擺韋達目的取Ｑ，傑仔回策，半冷開齋有望！漸信良駒可信程度甚微，小王執鞭不妨信多一次，蔡神仙用威德妙去串四連環，南非幫一網打盡！
（第八場）九龍木球會盃，法、非、澳三大高手均不似是爭盃主角，反而勞愛德配上科研精英負起擔大旗之責，今場目標馬為黃汝安之勁飛馳，此馬轉直路前仍是倒數第二，黎海榮不慌不忙，逐匹反先，以乘半之先捧走木球會盃，若無人俾膽，曷克臻此？八歲馬時代明星後上取一冷Ｑ，科研精英力保一席，亦云幸矣！
（第九場）好利利由隔夜而迄開賽都係一枝獨秀，競賽過程由頭至尾竟無一駒上前挑戰，大事底定後方見三匹馬並排影相，全程跟住韋達拍馬屁之福將臨門影相得梗頸，紅日、好有勝為殿後雙將，衝上由電眼分二、三，若將兩駒出閘包尾、直路走大外檔之損失減去，均有條件贏頭馬三乘以上，不妨誌之，以供參考。
（第十場）今場似是雙底出之局，騰雲駕霧今季四戰非贏即位，熱捧有根有據，而柏寶之快利多三場上陣難寄好評，唱至六倍幾已盡人事，可惜本地實力不中抬舉，連南非勞之納帕二號亦無法過頭，遑論進步神速之豪情拍檔？後駒最近兩仗由韋達取得一冠一亞，今次底出用鄭雨滇又跨前一大步，與減輕十七磅亦不無關係。
（第十一場）歡樂繽紛出賽以來七戰非冠即亞，熱捧有理，最難搵者冷腳一席而已！結果由首次上陣之飛銀動力做主，不論冷頭熱腳或熱頭冷腳，只要買多隻，其他彩池一樣收錢也！雖然有人話有靠搶之嫌，但映相之後，睇得見算你眼快，睇唔見算佢手快矣！三和之星、軍旗兩位一體，王志偉居然熱過柏寶，又如何解釋？
文章
沒有留言:
發佈留言