（第一場）先後十四仗未入三甲之大將風騷居然轉手即贏，去到電算機前已勝利在望，韋達之騎技與機智另具一格，從另一角度分析，入圍兩馬康樂名駒、兄弟班均屬南非系，甚至跑第四之飛躍星河亦係徐廐之見習生梁家偉，於是乎南非系連汁都撈埋，大將風騷已交出四班夠贏水準，韋字旗下又多一匹搵食馬！
（第二場）韋達上場半冷開齋，今場天下寶毫無過關跡象，同系馬標青一放即收，而愛蓮說後上太遲。柏寶騎上緣是燦爛目的在引開大眾目光，主力放在玩具神話及永得勝，潘頓、梁家俊誰是主力？尚在推測，但至少佢兩人都跑俾你睇。回鄉精神之都爾有如百搭，扮個樣似個樣。天下寶回配柏寶，不妨小敲。
（第三場）今仗二千二長途分開兩截，前一千米由杜利萊之經典能量唱獨腳戲，後千二米由十一匹馬魚貫而前，今場仍是韋達勁好友揸弗，睇住芝麻雪糕、瀟洒大少先後趕上，若非電訊高星從中作梗，活威小子走埋上嚟，南非系將頭場局勢，照辦煮碗！實力馬好歡騰、善風，時不利兮騅不逝，非關實力，隨時可派用場。
（第四場）今場形勢微妙，替出馬再來風一枝獨秀，次熱超勝與威士紀均接近七個開，而隔夜賠率大熱門勁多勝跑來毫無勁道，威士紀賦得個「跟」字，最合格已是大熱門超勝，可惜對太陽昇毫無威脅，是否因此馬最近兩捷同程均在南非系胯下？天曉得！今晚第一口孖Ｔ及第三口孖寶何人得利最多？難怪有人話無得玩矣！
（第五場）共同努力迄開跑前已跌近七倍，白德民排大外檔單騎放出後，全程自領，毫無威脅，總算打開勝利之門，此馬並無改錯名，今場時速較五班尤慢，若非共同努力，係乜？駕馭、奄尖大少分列二三無關宏旨，反正陪太子讀書！紅孖寶跑入四連環屬人棄我取，如雪山神駒騎者稍下騎功，不易輪到佢也！
（第六場）威威財星、延續美麗為並頭大熱，威威財星加注接近三倍，更似澳幫包辦第五口孖寶，閘門啟處，威威財星帶頭，金鑽龍華、此時此刻接踵而上，延續美麗到電算機前已名列第三，帶頭兩馬短兵相接，處女馬方於此時此刻開齋，難道妹仔大過主人婆？有場邊人曰︰你睇完第五口孖寶至講，原來縮水近三十巴仙！
（第七場）易搏贏再用主將柏寶押陣，去到轉直路前仍是第八名好漢，而前邊七騎竟分散嚟跑，變成條條大路通羅馬，柏寶之易搏贏通行無阻，話咁易就贏出！高耀之威上賽九十九倍，今次不足廿個開，三駒映相，居然映贏馬風雲與超新星兩個澳洲佬？或曰︰此馬身份一若上場此時此刻，睇錢份上，一齊嚟玩！
（第八場）煞科戲集中火力於包裝猛將、超群如意兩駒身上，熱頭必有冷腳出現，奇異福星、歡歡樂樂均屬兩匹熱門馬之副產品。賞蝦王份屬開路，帶入直路功成身退，奇異福星圖窮匕現，次熱超群如意話唔過就唔過，四十七倍之尾糊，胡森食硬！豈料清風送爽乘風而來，將澳幫好夢吹走。謀事在人，成事在天，信焉！
文章
沒有留言:
發佈留言