（第一場）四班短途有五匹新馬加入競逐，錢照贏憑柏寶之叫座力，一枝獨秀，小橋流水雖排第一檔，潘頓信心十足，逐步逼近，錢照贏於電算機前已為小橋流水越過。今日場地雖然濕軟，但千米直路完整無缺，時速比較標準。副車覓得寶跟番一席冷位。好笑容、好快活與領航人分列四五六，何駒先後無關宏旨。
（第二場）今場亦由新插班馬打骰，今次是韋達之川河勁駒，此馬雖排十四檔兩三個箭步即追近內檔放頭馬皇仁勁駒，韋達全程睇住勞愛德鞭打腳踢，後駒轉入直路即告玩完，反而川河勁駒贏馬有若晨操，較頭場之小橋流水有過之而無不及！駟馬難追、龍得風雲得個「跟」字，事實想追亦難，何不慳番以備他日再拚！
（第三場）戶外名駒易配柏寶去到電算機前已追貼八逢九紫及高手，大概穩位望贏矣！豈料圍內馬歡呼星大喝一聲我上！原來呢隻至係真料，如幕後人臨時有通知買番多少，尚情有可原，萬一為保存上手騎、練眼眉而剃咗自己老細個隻，的確賭馬難、養馬尤不易也！黃金褭蹄、勝利飛駒一嫩一老都應該留意。
（第四場）時時有機改配新紥師弟梁家偉捧成四倍首熱，唔到你唔服，由頭帶到尾，甜蜜至上若非有柏寶出盡八寶，齋砵仍然完整無缺！小梁之信心與騎功又垮前一步。有錢途、泰寶馬及喜鵲均有去意，僅得喜鵲入圍，泰寶馬小王舞佢唔掂，在退役之前何不換人或轉飯鑊試試。鐘表世家初露勇況，隨時可爆！
（第五場）真奇寶今季十一次上陣僅取一亞席，今次改用何澤堯押陣，雖排外檔仍取得有利陣地，最後二百米越過好小子、巴圖魯即替此駒取得第三場頭馬，力拒確叻星全力衝刺，可圈可点。好小子、心路分列三四，較旅遊大亨、幸運相架好睇得多，大熱門全程無一段交待，次熱門擅跑濕地仍難展所長，值得批評。
（第六場）上場旅遊大亨毫無表現，影響捧場客信心，喜綵由四倍回降至五個開，蔡明紹又恢復戰意，留頭鬥後全程睇住大熱門新意思，轉正直路即力策而前，贏出今日第一場頭馬。若卓利將長春樹在八百米途中曾受喜綵越線，因而須勒避及失蹄，長春樹有理由抗議得直，馬會事後罰人而不罰馬，不知何所見而云然！
（第七場）大摩摸熟馬迷心態，表面以同一世界掛帥，點心副之，只要話兩隻都去，今次點心行頭，唔關佢事！柏寶三駒電光能源、幸福紅椒及金德寶，目前以後駒為最弱一環，居然捧成首熱，旨在開路，大摩多得佢唔少也！好友福不惜將擁躉當阿福。夢幻組合目標四連環，普萊西若推多兩步，大局必亂！
（第八場）大摩好食番尋味，亞洲盃又係三駒列陣，上場同一世界是「實者虛之」，今回醉味配勞愛德則「實者實之」。據云外國馬場規矩是每個馬房得一個號碼，無論出馬多少，買中該號即有錢收，如此公道值得參考。今日場地濕軟，一分卅五秒有何駒不可交出？先後兩場大熱都係柏寶，捉路者將來有所適從！
（第九場）經過兩場猜謎遊戲後，又奉上一場所謂正路馬，據路邊社消息，馬主房貼士「3x4=12」獨贏買韋達，輸幾多買幾多云云，果然靈過生鬼谷，旅英駿駒力取飛闖係人都知，但蜚聲要映相後方有三重彩或單Ｔ收則驚到一額汗矣！更有一樣值得研究者，六十幾倍之濃情走入四連環派彩僅得百六，條數又點樣計？
（第十場）煞科戲胡森奉上一杯雪糕，休息近五月之驍將王，由二十倍跌至三十個開以上，如無人工製造曷克臻此？潘頓騎來有頭有尾，毫無久休復出之態，明燈為南非系主力，澳幫柏寶以相見歡分惠一杯，扮大花臉者為富高勝、步步快，總之周瑜打黃蓋，一個願打，一個願捱，否則戲不能演下去也！
文章
沒有留言:
發佈留言